فلسفه 22 – 1

فجأه سمعت صوت الخبطه ، بعدين خبطه تانيه مكتومه.

مكنتش مدرك الصوت جاي منين، لكن بشكل غير واعي حسيت انه جاي من فوق فبصيت, بعدين حسيت بشيء جنب رجلي.

عصفور صغير اتخدع من شكل الإزاز اللي في المبني و خبط فيه و هو طاير، لما أدركت وجوده كان جسمه الصغير بيرتجف ارتجافه أخيره و بعدين هدي تماما.

كان في ناس واقفه حضرت الموقف بردو و شافت العصفور بعد ما وقع، شهقات مكتومه من الخضه و تحذيرات اني ممسكوش، وطيت علي الجسم الساكن الصغير و رفعته براحه، بصيت جوه سواد العينين الخالي من لمعه الحياه و اختبرت و لو لثواني التجربه اللي البشر بيمارسوها من الالاف السنين، لما تعرف ان كائن بطل يبقي حي.

دفنته جنب شجره قريبه، هو مكنش دفن بقدر ما انا جبت علي الجسد الصغير تراب يكفي انه يغطي معظمه، الجو كان مشمس و جميل و السما زرقا بشكل محبب, الموت نقطه صغيره قدامي في وجود مفعم بالحياه حواليا.

و انا بعمل كده فكرت في واحد من أصدقائي المحببين، كان هيتأثر قوي لأنه حساس و قلبه طيب، افتكرته كمان لأني تخيلت هقوله ايه “شفت البساطه…شفت العشوائيه” ازاي كان هيعترض و يحاول يقنعني بايمانه ان كل شيء ليه “خطه”.

انا بحب صديقي و مدرك انه معندوش حل تاني، ميقدرش يبص بإصرار زي.

علي جثه كلب خبطته عربيه و الناس رمته علي جنب الطريق، ملامحه اتجمدت علي لحظات الألم اللي عانها و هو بيموت، في عين أب فقد ولاده في حرب ميعرفش قامت ليه بسبب قذيفه جايه من آلاف الأميال عنه، أو حتي أم فقدت بنتها عشان عربيه طايشه لسواق نقل سكران او شاب حب يّروش.

أضرب اللي بصيت عليه في ميه…في ألف….في ميه ألف…في ملايين…مجرد أرقام….ببساطه….بعشوائيه.      

انا بحب صديقي و عارف انه معندوش حل تاني، أي حاجة تانيه هتؤدي بيه للجنون و هو شخص لطيف لا يستحق الألم  و لا الجنون، و لا أنا أملك اني أبطل أبصّ.

كل ما أملكه التمني، التمني ان العصفور الصغير متألمش كتير و ان لو كان في حد مستنيه يقدر يتحمل فراقه…لحد ما يتقابلوا.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s