السلحفاه و الأرنب

7b939c813bdb90b90e4baa7b3d0631b3

غالبا هي دي قصه الأطفال الوحيده اللي محتاج تعرفها

القصه المشهوره اللي انت أكيد سمعتها قبل كده بتحكي عن سلحفاه في يوم اتحدت الأرنب انها ممكن تسبقه، طبعا الفكره كانت كوميديه للأرنب لكنه وافق علي التحدي و هو بيحلم باللحظه اللي هيبقي فيها علي خط النهايه بيشوف هزيمه السلحفاه المريعه

طبعا الأرنب من كتر ما هو متأكد انه أكيد هيكسب بعد ما السبق ابتدا و اتقدم بشكل كبير جدا علي السلحفاه البطيئه قرر انه ينام شويه…كده كده هو كسبان…طبعا النهايه اللي انت عارفها ان الأرنب عشان سرح في النوم و السلحفاه استمرت في التقدم برغم خطواتها البطيئه قدرت تكسب في النهايه

القصه تعبير عن فكره مستمره في الخيال البشري، فكره الموهبه الطاغيه في مقابل الإجتهاد المستمر، لكن الحقيقه انا شايف ان القصه انتهت بالنهايه الغلط…الأرنب كان بردو مفروض يفوز عشان تبقي قصه مفيده فعلا

ممكن تسأل و ليه كل الدوشه دي علي قصه أطفال بسيطه هدفها انها توصل فكره بسيطه ان الإجتهاد أهم من الموهبه و انه هو ده السبب الرئيسي للنجاح و انك تكسب السبق في الأخر

لأن الرساله اللي بتحاول توصلها أصلا غلط…مش بس غلط لأ دي كمان بتحط اللي بيقتنع بيها في موضع سلبي لما يخرج يواجه الحياه الحقيقه و بتعرضه لخسائر أكبر

مفيش حاجه اسمها ممكن تبقي أي حاجه انت عايزها، ده جزء من إدمان الإيجابية اللي ماشي موضه دلوقتي بحيث كل شويه نروح شادين خط إيجابيه نرفع بيه روحنا المعنوية في وش الإحباطات المتتالية، كل شخص ليه سقف لقدراته و اللي ممكن يحققه من الحياه بشكل مطلق…دي حقيقه لابد من مواجهتها بغض النظر عن مدي عداله الفكره، السؤال هنا ازاي ممكن اطلع أقصي استفاده من اللي معايا، هنا بتبان قوه الشغل المستمر الغير مربوط بفانتازيا خياليه في أحيان كتير ممكن تبقي عبء بدل ما تكون دافع

القصه مفروض تنتهي بفوز الأرنب لأن الدرس الحقيقي مش ان السلحفاة ممكن تتخطي حدود الموهبه المتاحه ليها بفوز خيالي و فانتازيا النهاي السعيده، لكن مكسب السلحفاة انها بالعمل المستمر ال consistent تقدر انها تطلع أقصي فايده من المتاح ليها، في الحقيقه هنا السلحفاه بقي عندها مكسب أهم بكتير من مكسب السبق مع الأرنب…مش بس شرف المحاوله لأ

حتي الموهبه اللامتناهية محتاجه الشغل ال consistent عشان تعرف توصل لأقصي ما يمكن ان تصل اليه…الموهبه بترفع سقف المتاح أعلي بكتير لكن بردو نفس طريقه الوصول للسقف هيا واحده، و القدره علي الشغل المستمر هي مهاره أساسيه قليل جدا اللي بيقدر يكتسبها، الشغل المستمر المنفصل عن أي فانتازيا او حتي هدف النجاح نفسه، هي أسلوب حياه أكتر من غير نقطه نهايه لمحاوله الوصول لأقصي ما يمكن الوصول اليه حيت لو ده معناه اني عمري ما هكسب الأرنب  

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s