مش معرض الكتاب

اهلا بيكم في الدورة ال 18 للمعرض بتاعنا، السنادي الدولة الضيف هي جمهورية مصر العربية العزيزة علينا كلنا، عشان كده اخترنا شاب مصري جميل عشان يكون هو اللي يسضيفنا في الجولة اللي هنعملها دلوقتي…اتفضلوا من هنا

* يبدأ الجمع في التحرك تجاه بوابة الدخول، تقابلهم لوحة فنية تحمل الاهرامات الثلاثة و أبا الهول مكتوب عليها “ادخلوها بسلام آمنين” *

* يبدأ الجمع بالتحرك تجاه الزاوية الاولي في الدور الاول، تحوي الزاوية شاشة عملاقة*

زي ما احنا شايفين الركن الاول ده مهم جدا، ركن ال PS  و ال  games, هنا بنشوف تاريخ كامل يا جماعة ، من أول winning eleven لما كنت بتحط روبورتو كارلوس في الهجوم عشان بيرزع و لما كان ممكن تجيب بأدريانو الله يمسيه بالخير اجوان من نص الملعب و طبعا FIFA 2000 اللي كنت بتجيب اجوان ب S,S,S,S,S,S,D حتي لو انت اعمي، مرورا بال counter  و ال medal من غير بوازيك لحد PES لما كانت بتحط علي FIFA ثم FIFA لما بقت بتحط علي PES

* يتحرك الجمع الي الركن التالي…مجموعة من قمصان لفرق الكرة المختلفة معلقة بعناية في حين ان الملابس العادية و البوكسرات تتوزع في نظام نصف عشوائي علي أرضية المكان *

هنا هنلاقي الجزء المحدد للهوية، الجزء اللي ممكن نضحي بيه بأرواحنا و دمائنا و بحلقات حريم السلطان الجزء الرابع عشانه، حيث متعة المنافسة الغير شريفة لما فريقك يغلب فريق صاحبك فتقعد تعاير في أمه سنين و هو يرد عليك و يقولك علي فكرة انت اتغلبتوا بنفس النتيجة ايام كاس السلطان قبل ما الديناصورات تنقرض من علي سطح الأرض..مهم جدا اني أوضح خطورة انك تيجي الركن ده و انت من الغير العالمين و تقول “انا مش فاهم ايه الفكرة في ناس بتجري ورا حتة كاوتش” أو بكل سذاجة تسأل “فهمني يا عمر يعني ايه أوفسايد عايزة أفهم”…رد الفعل ممكن يتجاوز في عنفه كل التوقعات عشان كده حبيت أحذر..يا ريت نتحرك من هنا علي الدور التاني

*يصعد الجمع الي الدور التاني*

 *يقترب الجمع من ركن مظلم الي حد ما تضيئه لوحة نيون مثيرة للشبهات*

باين طبعا احنا فين

انا حابب اتكلم بعمق شوية عن هذا الجزء العمي…

*يقاطع صوت الدليل أصوات مثيرة للشبهات بردو من داخل الركن المظلم، تبدأ علامات التوتر و الذعر تظهر علي وجوه السيدات و الفتيات في المجموعة*

وطي الصوت يا لطفي أو حط سماعات انا بعمل راوند، احنا عهنضحك علي مين؟ احنا في دماغ ذكر مصري 18 -25 سنة هنلاقي ايه يعني ؟؟ أكيد مش هتلاقي ديكارت بيتكلم عن فلسفة الشك مثلا

*من ركن ملاصق للركن المظلم تستمع المجموعة لحوار ما بين شخصين قاعدين علي طرابيزة*

ما تلعب يا عر*  ؟

ما تصبر يا خ** في ايه

ما انت بقالك ساعة بتفكر يا أخي يلعن ميت* اللي يلعب معاك

بقولك ايه يا م*** …..الله ده في راوند

و زي ما احنا سمعنا اذا كان الجزء المظلم بتاع لطفي مبرر بمجموعة من الأسباب البيولوجية و النفسية و الاجتماعية فركن السفالة و اللسان الزفر ده بقي مزاج ، بيمثل طريقة التواصل المحببة ما بين الذكر المصري و أقرانه مبنيا علي نظرية غريبة شوية اني بعبرلك عن صداقتي بذكر الاعضاء التناسلية وأهلك….أحدهما أو كليهما علي الترتيب…ممكن نطلع الدور التالت

*تنتقل المجموعة للدور التالت…تفاجيء المجموعة بان الدور التالت خالي تماما*

اه الدور التالت المحبب…طبعا ممكن تفتكروا غلط ان أكيد الدور ده تحت الانشاء أو حاجة لأن مش معقول يبقي في بني أدم دماغه فاضية للدرجة دي، لكن الحقيقة ان الذكر المصري عنده القدرة وقت اللزوم انه يفصل…يستطيع يلجأ هنا في اللاشيء للتمتع بسلام نفسي لبقرة حلوب وقت اللزوم…ممكن نيجي من هنا

*يقود الدليل المجموعة لقطعة عرض زجاجية في الركن*

يا جماعة احنا حظنا حلو ان احنا بتاخد الجولة في دماغ ذكر مصري عنده ذكاء و استيعاب عاطفي كبير زي ما احنا شايفين

*يشير الي داخل القطعة الزجاجية الي كنكة قهوة*

حبيب قلبي الولد حساس

كده نكون خلصنا الجولة بتاعتنا النهاردة أتمنا انكوا تكونوا استمتعتوا و استفتدتوا…يا ريت كلنا نخرج كلنا بهدوؤ من هنا البنات الأول عشان لطفي ما يسمعش هيطلع يتحرش بينا كلنا

One thought on “مش معرض الكتاب

  1. ايه صحيح الفكرة من ناس بتجري ورا كاوتشة 😛 ?
    جميل البوست ده بيؤكد فعلا ان الشاب المصري دماغه محتاجة زيارة .. زود عليهم الله يكرمك دول :

    – ركن في كلاكيع مكلكعة يمثل ما يحمله من أفكار متناقضة وعتيقة
    – ركن الmale ego .. وده عايزله دور لوحده بصراحة بيشغل حيز كبير
    – ركن للأميجدالا .. اللي عليه سوفت وير الطوارئ .. اللي بيحدد فلان هيتصرف ويلحق وينقذ الموقف ولا هيبلم لحد ما الموقف يعدي
    – في ركن لبوسترات باتمان وجوثام سيتي – مش عارفع سر الهوس ايه بس هو مهم
    – ركن الذكريات .. ذي بتاع هشام الجخ كدة والتار البايت عند البنات اللي كل على – سوري يعني- قفاه منهم
    – في ركن فيه حاجات ميتة , تقريبا كده مبينضفش , ممكن تبقى تأكد علي القائمين بالراوندز يشوفوا الموضوع ده تجنباً للفضايح
    – في ركن مهم قوي اسمه الصندوق الأسود .. هو ميعرفش بوجوده , بيكون متخزن عيه ألم اللاوعي نفسه مش فاكره . لكن مع موقف واحد بسيط all hell breaks loose
    -في ركن بقى .. بينور لما يحس أو يشوف أو يسمع حاجة حلوة تسّمع في قلبه .. فالمكان كله ينور والجسم يتغرق اندورفينز

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s