لأ مش المريوطية

بمحض الصدفة البحتة عرفت ان في تجمع للناس اللي موجودة في اليابان عن طريق airbnb  قبله بساعتين, قررت اني أغير خطة اليوم و أروح أقابل الأخوة السياح اللي زي, مفروض ان التجمع تحت رعاية واحدة من المضيفين اليابانيين عشان تورينا المنطقة بتاعتها و بعدين نتغدا كلنا سوا

المجموعة كانت متنوعة من شوية بلدان, كندا..استراليا..ألمانيا…نيوزلندا…انجلترا, و أعمار مختلفة كمان لكن انا كنت الوحيد اللي جاي لوحدي كله جاي مع صديق أو نصه التاني, المثير في مقابلة المسافرين اللي زيك هي الرغبة المتبادلة في المعرفة, مفيش هما كلمتين تعارف وابتدينا كلنا نتكلم مع بعض ببساطة شديدة

التنوع في الأعمار ملفت للنظر, من أول الثنائي الكندي اللطيف Gordon و Kayla  اللي بيقضوا شهر العسل, هما الاتنين عندهم 25 سنة (يبدوا و الله أعلم ان في كندا معندهمش الحكمة المصرية في انك تتجوز البنت أصغر منك عشان معروف طبعا ان البنت بتعجز بدري و الراجل بيلاقي نفسه لسه في صحته و مراته مش قادرة تقضي احتياجاته و بعدين الصغيرة تشكلها علي مزاجك و….عالم غلبانة قوي) ل Gushwa  و مراته اللي لسه متجوزين بعد علاقة عشرين سنة !!! اخدوا وقتهم عشان يعرفوا بعض..كتير من المجموعة كان متابع أخبار مصر و سألوني عن الوضع هناك عامل ازاي و لما كنت بتكلم كان مهتمين جدا خاصة و أنا بحاول أشرح الموقف المعقد في مصر يبعد 30 يونيو

من أهم مميزات السفر انك نفهم قد ايه العالم أكبر من معتقادتك و حياتك و مشاكلك..كبير لدرجة تخلي أي فكرة أو عقيدة تحاول تقولك ان انت بس اللي صح و الباقي كله ديكور رايحين النارهي عقيدة متخلفة عقليا و عبيطة بشكل مضحك…السفر بيعلمك الوصلة اللي كانت مابين كل الناس دي في رحلة كل واحد فيهم في البحث عن السعادة و المعني

السفر بيديك فرصة انك تتعلم تعيش في براح