عايز أحكيلكوا عن المكان اللي أنا قاعد فيه, من خلال أكثر موقع عبقري في تاريخ الانترنت airbnb اللي بيخلي الناس تأجر أوضة في شققهم أو شقق كاملة للمسافرين حوالين العالم بأسعار أقل من الفنادق أنا قاعد دلوقتي في بيت مضيفتي اللطيفة Tomoko و جوزها Ryuta

البيت درس في فن استغلال المساحة, كله علي بعضه ميعديش ال 70 متر فالبنسبالهم البيوت عندنا استاد القاهرة, لكن بردو هما معندهمش أطفال, البيت فيه كل حاجة محسوبة بالسنتيمتر لتحقيق أقصي استفادة بأقل حاجات ممكنة, أنا لو قلتلها علي موضوع النيش احتمال تطردني, في لمض بتشتغل بSensor حركة و الباقي الزرار نفسه بيبقي فيه لمبة صغيرة بتنور أحمر لما يكون شغال عشان تاخد بالك و تطفيه لما تخلص,في لمبة لمراية الحمام اختراع لوحده, بتنور الأول درجة خفيفة و بتقوي لو سبتها شوية علي أساس انك ممكن متحتاجش فيها اضاءة قوية لو بتغسل وشك أو سنانك من غير ما تنور نور الحمام كله

من العبث الكلام عن طريقة تعامل الشعب الياباني, مش عشان هيبقي كلام مكرر لكن لأنه لا يمكن وصفه فعلا بالكلام, ده موروث ثقافي شديد القوة و التأثير, الناس دي بتتعامل بهذه الدرجة المبالغ فيها من الأدب في كل وقت و مع بعض مش عشان أنا شكلي أجنبي, في نص اليوم كانت الانحناءة ojigi بالنسبالي طبيعية جدا, لا أعتقد ان فيه في العالم كله موظفين سواء في محلات أو موظفين حكومة أكثر متعة في التعامل و أكثر مساعدة, لما كنت بسأل علي حاجة حرفيا بيجري قدامي عشان يوريني لدرجة محرجة خاصة لو حد كبير و بيجبرني أنحني فعلا ليه  أدبا و احتراما

من الطبيعي جدا انك تشوف راجل أو ست عندهم 60 أو 70 سنة شغالين عامل في سوبر ماركت أو في بنزينة, طبعا ده سن السباب هنا لأنه عادي بردة تشوف بني أدم عنده 140 سنة تقريبا ماشي جنبك في الشارع, السمنة هنا قليلو و لو ان الجيل الجديد متعود اكتر علي نمط الحياة الغربية فشفت أكتر من حد تخين ولاد و بنات عادي, و بالمناسبة اليبانيين مش قصيرين أطوالهم طبيعية جدا خاصة الجيل الأصغر ان لم يكن أقرب للطول خاصة البنات…دي علامة يا مارد