الوصول

اهلا بكم في طوكيو..الساعة دلوقتي 3:32 صباحا و درجة الحرارة 19 درجة مؤوية

من الحاجات المهمة اللي عايز أعملها في الرحلة دي ان مخليش التوقعات و الخيالات المعتادة عن اليابان انها تأثر على التجربة, غالبا التوقعات بتبوظ التجربة, فعادي مش هنهار نفسيا لو لقيت مقلب زبالة و أنا ماشي أو القطر اتاخر تلت ساعة و أنا مستني أشوفه جي بالثانية…لكن الراجل الرخم بتاع الجوازات مصمم انه ينكد عليا

لما سألني أول مرة أزور اليابان و قلتله أه طلب مني انه يفتح الشنطة, هو معملش كده مع كل الناس اللي قبلي بس قلت أكيد عشان أنا أول مرة أجي, فتح الشنطة و قلب فيها و بعدين قفلها و اذا بيا أفاجيء انه بيقلع الكاب و بينحني و بيشكرني اني اتعاونت معاه…اتعاونت معاه دي اللي هيا وافقت يفتح الشنطة و هو ظابط جوازات

ما علينا أكيد غلطة منه…خرجت و قابلت مضيفتي اللطيفة توموكو, كنت فاكر انها هتيجي توصلني بالعربية بعدين اكتشفت ان احنا حنركب المترو و الساعة 12, المترو و القطر في اليابان من الأكفأ علي مستوي العالم و في المدن الكبيرة زي طوكيو مفيش حتة مش بيوصلوا ليها, بردو معروف عن المترو في طوكيو ان بيبقي زحمة..لا زحمة فشخ يعني

IMG_0504

السيناريو كالأتي..انت بتركب عادي جدا زي أي بني أدم طبيعي, واحدة واحدة الناس تبتدي تدخل, و فجأة تلاقي نفسك حرفيا في حضن اللي جنبك بشكل حتي مش في مصر, الغريب ان نظام علبة التونة ده عادي جدا و الناس متعودة عليه حتي البنات لدرجة ان محدش بيرفع عينه من الموبايل, زي الأنسة اللي قعدت 4 محطات في حضني مكملة شات عادي علي اساس انه طبيعي اني و انا مروح من الشغل اروح في بق واحد و ايه مش من البلد كمان, كنت اتمني اني أقول ان ده بسبب جاذبيتي التي لا تقاوم لكن الموضوع كله ان الدنيا زحمة لدرجة اني أنا اتكسفت…معندكيش اخوات ولاد

وصلنا أخيرا بعد تجربة المترو و كان أهم و أول حاجة محناج أطمن عليها قبل أي شيء

IMG_0507

انا علي اخر الزمن أقف نص ساعة عشان اعرف الشطافة منين..ده فيه أوبشنز أكتر من عربيتي

One thought on “الوصول

  1. هههه مضحكة جدا …الجديد فى صورك انك مختلف كل الناس بتروح تصور المناظرةالجديدة او الطبيعية وانتا رايح تصور التواليت والزحمة 😀

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s