الأستاذ الفيلسوف

الأستاذ الفيلسوف
دايما بيحاول يفكر
فاكر نفسه بيشوف
كان فاكر نفسه فاهم عن باقي الناس
الواد الجامد الحساس
و زي أي فيلسوف
بيقرا كتب و نظريات
بيكتب أشعار و حاجات
بس الحياة حبت تعلمه درس
ازاي الكلام ممكن يبقى أي كلام
افتح يا بني الكراس و اكتب
عمر مالحياة تتفهم من على مكتب
اتعلم ازاي تتعلم من الألم هتكسب
الأستاذ الفيلسوف
كان فاكر نفسه انه لقى الطريق
بس لما لقى الطريق بيضيق
شاف اللي كان خايف يشوفه طول عمره
السجن اللي قعد فيه باختياره طول عمره
طلع زي كل الناس…جبان…خواف
من الألم
من الاحساس
صفحة جديدة في الكراس
محدش قام غير لما اداس
امسك كويس و اكتب بالقلم
عشان أتعلم هاخد ميت قلم
عشان تشوف لازم تتعلم تشوف
لازم تحس بالخوف
لازم تتعلم من الألم
يا استاذ يا فيلسوف هو ده درس الحياه
كل حاجة و ليها تمن